యువరాజ్ సింగ్ రీఎంట్రీకి బ్రేక్.. సరికొత్త కారణం వెలుగులోకి

Sports

టీమిండియా మాజీ ఆల్‌రౌండర్ యువరాజ్ సింగ్ పునరాగమనానికి బ్రేక్‌‌లు పడ్డాయి. 2019, జూన్‌లో అంతర్జాతీయ క్రికెట్‌తో ఐపీఎల్‌కి కూడా రిటైర్మెంట్ ప్రకటించిన యువరాజ్ సింగ్.. భారత క్రికెట్ నియంత్రణ మండలి (బీసీసీఐ) నుంచి నిరభ్యంతర పత్రం తీసుకుని రెండు విదేశీ ప్రైవేట్ లీగ్స్‌లో ఆడేశాడు. కానీ.. ఇప్పుడు పంజాబ్ క్రికెట్ అసోషియేషన్ సెక్రటరీ పునీత్ బలి అభ్యర్థన మేరకు తాను రిటైర్మెంట్‌‌ని వెనక్కి తీసుకోవాలని ఆశిస్తున్నట్లు చెప్పుకొచ్చిన యువరాజ్ సింగ్.. దేశవాళీలో మళ్లీ తాను పంజాబ్ తరఫున ఆడాలని కోరుకుంటున్నట్లు వెల్లడించాడు. ఈ మేరకు బీసీసీఐ అధ్యక్షుడు సౌరవ్ గంగూలీ అనుమతి కోరుతూ మెయిల్‌ పంపిన యువీ.. అతని సమాధానం కోసం ఎదురుచూస్తున్నాడు. కానీ.. అతని రీఎంట్రీ కష్టమేనని తాజాగా బీసీసీఐ సీనియర్ అధికారి ఒకరు స్పష్టం చేశారు.

సాధారణంగా భారత క్రికెటర్ ఎవరైనా విదేశీ ప్రైవేట్ లీగ్స్‌లో ఆడాలంటే..? అంతర్జాతీయ క్రికెట్‌తో పాటు ఐపీఎల్, దేశవాళీ క్రికెట్‌కి కూడా రిటైర్మెంట్ ప్రకటించి బీసీసీఐ నుంచి ఎన్‌వోసీని తీసుకోవాలి. అలానే ఒక్కసారి విదేశీ ప్రైవేట్ లీగ్‌లో ఆడిన భారత క్రికెటర్‌ని ఎట్టి పరిస్థితుల్లోనూ బీసీసీఐ మళ్లీ తన ఆధ్వర్యంలో జరిగే ఏ టోర్నీలోనూ ఆడేందుకు అనుమతించదు. రిటైర్మెంట్ వెనక్కి తీసుకున్నా సరే.. అనుమతించకూడదని బీసీసీఐ రూల్స్‌లో ఉంది. ఇప్పుడు ఇదే రూల్‌ని యువీ రీఎంట్రీని అడ్డుకోబోతోంది. గత ఏడాది కెనడా గ్లోబల్ టీ20, యూఏఈలో జరిగిన టీ10 లీగ్‌లో యువరాజ్ సింగ్ ఆడిన విషయం తెలిసిందే.

యువీ తరహాలోనే భారత సీనియర్ స్పిన్నర్ ప్రవీణ్ తంబే రిటైర్మెంట్ వెనక్కి తీసుకుని ఐపీఎల్ 2020 సీజన్‌లో ఆడేందుకు ప్రయత్నించాడు. ఐపీఎల్ వేలంలో అతడ్ని కోల్‌కతా నైట్‌రైడర్స్ ఫ్రాంఛైజీ కొనుగోలు చేసింది. కానీ.. కొన్ని రోజుల్లోనే అతను ఐపీఎల్ ఆడేందుకు అనర్హుడిగా బీసీసీఐ తేల్చింది. 2018లో రిటైర్మెంట్ ప్రకటించిన ప్రవీణ్ తంబే అదే ఏడాది టీ10 లీగ్‌లో ఆడాడు. కానీ.. 2019లో అతను రిటైర్మెంట్‌ని వెనక్కి తీసుకున్నాడు. అయినప్పటికీ.. బీసీసీఐ నీ కోసం రూల్స్ మార్చబోమంటూ అతడిపై వేటు వేసింది. ఇప్పుడు యువీ విషయంలోనూ అదే జరగబోతోందని బీసీసీఐ అధికారి తేల్చి చెప్పేశారు.

రిటైర్మెంట్ ప్రకటించిన తర్వాత బీసీసీఐ నుంచి ఇప్పటికే వన్ టైమ్ బెనిఫిట్‌ని యువరాజ్ సింగ్ అందుకున్నాడని చెప్పుకొచ్చిన బీసీసీఐ అధికారి.. రూ.22,500 పెన్షన్‌ని కూడా గత ఏడాది నుంచి ఈ మాజీ ఆల్‌రౌండర్ తీసుకుంటున్నట్లు స్పష్టం చేశాడు. బీసీసీఐ రికార్డుల్లోనూ ఇప్పటికే రిటైర్మెంట్ క్రికెటర్ల జాబితాలో యువరాజ్ సింగ్ పేరుని చేర్చామని వివరించిన సదరు అధికారి.. అతని రిటైర్మెంట్‌ని వెనక్కి తీసుకోవడంపై ఇక తుది నిర్ణయం బీసీసీఐ పెద్దలు తీసుకోనున్నారని వెల్లడించాడు.

Leave a Reply

Your email address will not be published. Required fields are marked *